Mótmælin halda áfram

Ég kom við á Austurvelli eftir vinnu í dag til að upplifa mótmælin öðruvísi en í gegnum fjölmiðla. Þar var fyrir hópur fólks á öllum aldri sem trommaði og hrópaði "Vanhæf ríkisstjórn". Lögreglan stóð síðan vaktina á móti mótmælendunum. Ég gæti vel trúað að einhver slatti lögreglumanna vildi allt eins vera staddur í hópi mótmælanda. Þegar allt kemur til alls þá eru lögreglumenn einnig íbúar þessa lands og ástandið hefur bitnað á þeirra kjörum alveg eins og allra annara. Afskaplega fundust mér svo hallærislegir þeir sem komu með klúta fyrir andliti til að þekkjast ekki. Meðan ég staldraði við þá kom hópur söngfólks og söng nokkur lög. Þetta braut mótmælin upp á jákvæðan og skemmtilegan hátt.

Ingibjörg Sólrún er tilbúin til að halda lífi í Geir í einhverja daga enn. Hún er þó loks komin á þá skoðun að það þurfi að kjósa í vor. Það þarf bara að passa uppá að hún og hinir snillingarnir í ríkisstjórninni haldi áfram að vera við kjötkatlana þannig að aðrir geti ekki komist að. Kannski er hún hrædd um að missa ritstjórnarvald yfir hvítbókinni sem hún og Geir eru að láta skrifa um sig. Þessi valdsstjórn ætti hins vegar að sjá að dagar hennar eru taldir og fara frá. Sjálfstæðisflokknum er alls ekki treystandi fyrir hagstjórn, þeir hafa klúðrað málum svo gersamlega að börnin mín hefja lífsbaráttuna í þjóðfélagi sem er á góðri leið með að verða þriðja heims ríki. Samfylkingunni er vorkun. Gleði þeirra við að komast loks að var svo mikil að þau gleymdu að það er ekki nóg að sitja í stólunum og koma sínum flokksmönnum á rétta staði í stjórnkerfinu. Það gleymdist alveg að vinna þá vinnu sem þau réðu sig í.

Vonandi lifir ríkisstjórnin ekki fram að helgi.

Á þriðja hundrað á Austurvelli

Stórhuga sveitarfélag

Fyrir nokkrum árum sameinuðust Skeiðahreppur og Gnúpverjahreppur. Þessi sameining var orðin löngu tímabær en því miður var hún ekki nægjanlega stór. Ekki var haft samband við Hrunamenn og því fór það þannig að til varð Skeiða- og Gnúpverjahreppur.

Í fyrstu var hreppurinn rekinn þannig að þær stofnanir sem þar voru héldu sér óbreyttar en að lokum var grunnskólinn fluttur í Árnes og leikskólinn fluttur í Brautarholt. Þessir flutningar á skóla voru umdeildir í sveitarfélaginu og má segja að fylkingar hafi skipst eftir gömlu hreppamörkunum. Þegar grunnskólinn var fluttur úr Brautarholti var m.a. bent á sem röksemd fyrir að halda honum þar að þar væri nýbyggður íþróttasalur í stað þess gamla sem eyðilagðist í jarðskjálftanum árið 2000.

Grunnskólamálin voru kosningamál í síðustu sveitarstjórnarkosningum og í kosningabaráttunni var núverandi meirihluta bent á að flutningur skólans væri óhagkvæmur þar sem aðstaða til íþróttaiðkunar, sunds og mötuneytis væri þar öll til fyrirmyndar en því væri ekki að heilsa í Árnesi. Núverandi meirihluti benti þá á salinn sem væri í Árnesi í um 600 metra fjarlægð frá skólanum en þar væri bæði mötuneyti og íþróttaaðstaða. Þeim var bent á að á kjörtímabilinu myndu þeir líklega leggja til byggingu íþróttasalar en mótrök þeirra voru að slík eyðsla yrði ekki.

Núna er sveitarstjórn búin að samþykkja að leigja Landsvirkjun salinn í Árnesi til 10 ára. Fyrir þetta fær sveitarfélagið 85 milljónir. Strax eftir þessa samþykkt föttuðu sveitarstjórnarmenn meirihlutans að þeir væru búnir að leigja frá sér íþróttaaðstöðu skólans og mötuneytið. En lausnin var fljótfundin. Bara að byggja nýjan sal. Kostnaður verður sennilega ekki undir 200 milljónum en hvað er það í svona góðæri. Hugsunin er talsvert 2007. Þegar leigutíma lýkur þá er þetta 500 manna sveitarfélag með þrjú íþróttahús, 187 íbúar á hvert hús.

Næsta mál á dagskrá verður að byggja þyrlupall í Árnesi svo sveitarfélagið geti keypt eitthvað af góðæris þyrlunum á brunaútsölunni.

Velkominn í hópinn Geir

Geir H. Haarde fannst sér ógnað í dag af almenningi. Daglega finnst almenningi Geir H. Haarde ógna sér. Hann hefur staðið í framvarðarlínu þeirra sem afhentu glæpamönnum bankana. Hann var fremstur í flokki þeirra sem afneituðu ástandinu og héldu ræður um hversu vel bankarnir stæðu. Hann samþykkti fyrir hönd allra íslendinga að greiða skuldir óreiðumanna og gerði okkur þar með að skuldugustu þjóð í heimi. Hann hefur stuðlað að því að lánin okkar hækka. Hann ber ábyrgð á hækkandi vöruverði.

Mér finnst mér ógnað af Geir H. Haarde á hverjum degi.

Ekki á kosningabuxunum

Valdstjórnin

Það er eiginlega aðeins eitt orð sem lýsir þeirri ríkisstjórn sem er nú við völd. Valdstjórn. Það er meira að segja þannig að Björn Bjarnason er farinn að nota það í tíma og ótíma. Þessi ríkisstjórn ríkir í krafti atkvæða sem greidd voru í miklu góðæri. Sjálfstæðisflokkurinn auglýsti að engum væri betur treystandi fyrir efnahagsmálum en þeim og Samfylkingin sagðist vera höfuðandstæðingur Sjálfstæðisflokksins. Báðir voru síðan sammála um að kosningarnar snerust ekki um inngöngu í ESB.

Mánaðarmótin sept - okt 2008 hrundu síðan allar forsendur fyrir áframhaldandi starfi þessarar ríkisstjórnar. Það má eiginlega segja að á þeim tímapunkti hafi hún tekið völdin, hætt að vera ríkisstjórn og orðið valdsstjórn. Enda er nú svo komið að ráðherrar þora ekki að ganga meðal almennings án lífvarða og hlaupa um í neðanjarðargöngum á flótta undan þeim sem greiddu þeim atkvæði á sínum tíma. Aðgerðarleysi þessarar ríkisstjórnar hafa leitt hrun yfir þjóðina, bæði þá sem kusu þessa flokka og eins okkur hin. Verð á nauðsynjavörum hækkar upp úr öllu valdi, vöruskortur er í verslunum, skuldir og afborganir hækka og Valdsstjórnin talar bara um að það þurfi nú að fara að gera eitthvað. Á sama tíma tilkynnir sýslumaðurinn á Selfossi að handtaka eigi skuldara. Hann er búinn að persónugera ástandið.

Það er kominn tími til að valdaræningjarnir í Valdstjórninni víki og boði til kosninga svo hægt verði að koma að réttkjörnum fulltrúum.

Óslóartréð borið á bálið

Er ekki komið nóg.

Lögregla er farin að beita kylfum á mótmælendur. Hverju á það á áorka öðru en meiri hörku í mótmælum. Það er löngu þekkt að menn láta hart mæta hörðu. Lögreglan notað það sem afsökun á framferði sínu að hent hafi verið í þá grjóti en það er samt engin afsökun fyrir því að berja fólk með kylfum í höfuðið eða að handleggsbrjóta það.

Síðan eru ráðherrar fluttir í gegnum leyniganga frá "lýðnum". Af hverju þora þeir ekki að mæta atkvæðunum og ræða við þau. Kannski er það vegna þess að forsætisráðherra og hans slekti veit loks uppá sig sökina. Ég held að þetta lið ætti að segja af sér hið snarasta.

Nú er ég ekki hrifinn af ofbeldi en því miður virðist ofbeldi vera það eina sem ráðherrar og þingmenn skilja. Menntamálaráðherra tjáir sig oftast þegar hún verður fyrir truflun vegna mótmæla og þá hefur hún áhyggjur af ástandinu, annars segir hún ekkert.

Æji, kannski eru þessi læti eina leiðin til að ná eyrum ráðamanna.

Beittu kylfum á mótmælendur

Ný Framsókn

Það fór að lokum svo að Frí amsóknarflokkurinn varð fyrsti flokkurinn til að taka til í eigin ranni eftir fall "Gamla Íslands". Nú er svo komið að engir af fyrrum ráðherrum flokksins eru í stjórnunarstöðu innan flokksins, þar er einungis ungt fólk sem ber enga ábyrgð á þeim ákvörðunum sem teknar voru í tíð fyrri ríkisstjórna. Valgerður Sverrisdóttir hafði til þess dug og þor að bjóða sig ekki fram til formanns með þeim orðum að hún væri of tengd bankamálinu til að hún væri raunhæfur kostur sem formaður.

Nú er bara að bíða og sjá hvort hinir flokkarnir hafi kjark og þor til að bregðast við á sömu leið og Framsóknarflokkurinn. Ég hef hins vegar enga trú á að svo verði. Sjálfstæðisflokkurinn er orðinn of valdspilltur til að sjá að þingmenn og ráðherrar flokksins hafi gert nokkuð rangt. Forsætisráðherra hefur orðið margoft uppvís að því að ljúga að þjóðinni í fréttaviðtölum, lygar sem var óþarfi fyrir hann að segja. Hann er of mikið flæktur í bankahrunið til að geta skoðað málið hlutlaust. Fjármálaráðherra er blindur á eigin gerðir og sér ekki hvað hann hefur gert rangt í neinu máli. Það eru allir aðrir sem eru vitlausir, hann er sá eini sem veit hvernig á að gera hlutina. Ég slæ því hér fram að Sjálfstæðisflokkurinn komi ekki til með að þora í prófkjör fyrir næstu kosningar.

Samfylkingin er hins vegar búin að afhjúpa sig í sínu fyrsta stjórnarsamstarfi. Flokkurinn er sundurlaus hópur sem talar út og suður um málefnin. Ráðherrar virðast ekki geta sett sig inn í þau mál sem heyrir undir þeirra málaflokk. Eina sem virðist komast að hjá Samfylkingunni er að ná völdum, hanga á þeim eins lengi og hægt er, selja allar sínar hugsjónir til að halda völdum og að lokum koma sínum mönnum á rétta staði í kerfinu.

Hvað hefði fólk sagt ?????

Ætli menn hefðu svo sem sagt meira um að "eyða" í lögsókn gegn Bretum heldur en sagt var um þá eyðslu þegar hundraðamilljónum var eytt í kosningabaráttu vegna Öryggisráðsins.

Væntu of mikils af dómsmáli

Hann mætir ekki

Dómsmálaráðherra er ekki maður sem talar við lýðinn. Hans aðferð er að skrifa á heimasíðuna sína og við hin eigum síðan bara að lesa það sem hans hágöfgi skrifar, gagnrýnilaust. Dómsmálaráðherra er dæmi um stjórnmálamann sem finnst hann vera hafinn yfir gagnrýni og að þurfa að lítillækka sig við samskipti við alþýðu manna. Því miður hefur draumar hans orðið til þess að Ísland er á leiðinni með að verða að litlu lögregluríki. Væri t.d. ekki nær að nota fjármuni til að efla almenna löggæslu frekar en að stofna leynilögreglu (greiningadeild) og eyða stórfé í víkingasveit. Ef lögreglan hefði fleiri Geirjóna (Jóngeira) í stað Gasmanna þá væri ástand við mótmæli ekki eins slæmt og það stundum vill verða.

Birni boðið í pallborðið

Af hverju ekki að byrja hjá sjálfum sér?

Góðar tillögur hjá VG en það hefði verið gott að líta sér nær. Hér koma nokkrar sparnaðartillögur í viðbót:

• Breyta eftirlaunakjörum þingmanna og ráðherra til samræmis við eftirlaun almennra launþega
• Leggja niður stöður aðstoðarmanna þingmanna og ráðherra
• Setja lög um ráðningar til ráðuneyta sem eru utan skipulags (fjölmiðlafulltrúar o.fl.)
• Leggja a dagpeningagreiðslur vegna maka þingmanna og ráðherra
• Láta þingmenn og ráðherra falla undir sömu lög og aðra launþega þegar kemur að greiðslum vegna starfstengds kostnaðar
• Breyta biðlaunareglum þingmanna og ráðherra til samræmis við venjulega launþega
• Loka nokkrum sendiráðum (t.d. 10)

Vinstri grænir kynna þrjú frumvörp um skattabreytingar

Hættum að kasta í Alþingi - aðrar hugmyndir

Friðsamleg mótmæli eru af hinu góða. Mér finnst hins vegar tími til kominn að menn hætti að kasta eggjum í alþingishúsið. Miklu nær væri að kasta í aðrar byggingar svo sem 101 Hótel við Hverfisgötu, en það hótel er í eigu Jóns Ásgeirs eða húsið sem Björgólfur keypti í Hljómskálagarðinum.

Þegar Alþingi er útbíað í eggjum þá fellur kostnaðurinn á okkur en þegar Útrásarglæpamennirnir þurfa að hreinsa þá borga þeir sjálfir.

Austurvöllur fyrr og nú