Ráðherrar Sjálfstæðisflokks og Samfylkingar ekki samstíga

Í haust kom Björgvin Sigurðsson, viðskiptaráðherra, fram á forsíður dagblaðanna með þær yfirlýsingar að nú ætti að bæta hag lántakanda íbúðarlána með niðurfellingu stimpilgjalda af lánunum. Þessar yfirlýsingar ráðherra rötuðu á forsíður flestra blaða nokkra daga í röð með alls konar greinarskrifum og úttektum á ágæti þessarar aðgerðar hans. Í 24 stundum fimmtudaginn 8. nóv. var hins vegar lítil frétt á síðu 6, frétt sem ekki hefur fengið mikla umfjöllun eða fyrirsagnir. Fréttin er svo stutt að ég nenni að skrifa hana upp hér á eftir:

"Stimpilgjöldin innheimt áfram  Stimpilgjöld af lánum verða ekki afnumin á næsta ári. Ríkisstjórnin hyggst fella þau niður þegar aðstæður á fasteignamarkaði gefa tilefni til. Vaxtahækkanir banka og ákvörðun Kaupþings um að stöðva framsal íbúðarlána breytir ekki forgangsröðun fjármálaráðherra. Hvort stimpilgjöldin hverfa á þarnæsta ári eða rétt fyrir næstu kosningar gæti skýrst í vor"

Svo mörg voru þau orð. Það er dálítið forvitnilegt til að hugsa að svona misvísandi yfirlýsingar ráðherra í síðustu ríkisstjórn hefðu líklega orðið til þess að einhver fjölmiðillinn hefði rokið upp og slegið því upp á forsíðu að menn væru ekki sammála.

Eftir stendur samt sem áður að viðskiptaráðherra er greinilega full fljótur á sér þegar kemur að því að slá sig til riddara. Eða virkar stjórnarsamstarfið kannski þannig að Samfylkingin er eins og krakki að gaspra um menn og málefni og síðan kemur hinn ábyrgi Sjálfstæðisflokkur og tuktar krakkann og leiðréttir delluna. 

Athugasemdir

[Sig.Jónsson (IP-tala skráð) 11.11.2007 kl. 22:48]

Ég hef nú ekki alltaf verið ánægður með sveitunga okkar hann Björgvin viðskiptaráðherra. Ég ætlaði samt að gefa honum nokkur prik fyrir að koma því í gegn að stimpilgjöldin yrðu aflögð. Það er svo hrikalega ósanngjarnt að ríkið skuli innheimta skatt ef við tökum lán. Því miður virðist ætla að verða einhver bið á því að ég geti gefið honum þessi prik. Kannski verða þau bara orðin fúin þegar kemur að afhendingu eða kannski verður aldrei hægt að afhenda þau.